ភ្នំពេញ៖ អនុប្រធានគណបក្សភ្លើងទៀនលោក ថាច់ សេដ្ឋា ត្រូវបានតុលាការបញ្ជាឲ្យឃុំខ្លួនជាបណ្ដោះអាសន្ន បន្ទាប់ពីត្រូវបានឃាត់ខ្លួមមកសួរនាំកាលពីល្ងាចថ្ងៃទី១៦ ខែមករា ឆ្នាំ២០២៣។
កម្លាំងអាជ្ញាធរឃាត់ខ្លួនកាលពីល្ងាចថ្ងៃទី១៦ ខែមករា នេះតាមដីការបស់តុលាការ ដែលបានចោទប្រកាន់លោក ថាច់ សេដ្ឋា ក្រោមបទចោទប្រកាន់ «មិនបំពេញកាតព្វកិច្ចចំពោះ ឧបករណ៍អាចជួញដូរបាន» (សែកស្អុយ) កាលពីឆ្នាំ២០១៩។
នៅយប់ថ្ងៃទី១៦ ខែមករានេះ បន្ទាប់ពីស៊ើបសួរ តុលាការក៏សម្រេចបញ្ជូនលោក ថាច់ សេដ្ឋា ទៅឃុំខ្លួននៅមន្ទីរអប់រំកែប្រែទី១ រង់ចាំបញ្ជាថ្មី។
អ្វីដែលគួរចាប់អារម្មណ៍នោះ គឺការឃាត់ និងឃុំខ្លួនលោកថាច់ សេដ្ឋា នៅពេលនេះគឺបន្ទាប់ពីលោកត្រូវបានលោក ហ៊ុន ម៉ាណែត ណែនាំកាលពីប៉ុន្មានសប្តាហ៍មុននឹងត្រូវបានទម្លាយដោយនាយករដ្ឋមន្ត្រីកម្ពុជាសម្ដេចតេជោ ហ៊ុន សែន ថាបើមិនចង់ឲ្យគេចាប់ខ្លួនគឺសូមកុំធ្វើខុសច្បាប់។
សម្ដេចតេជោថា៖ «ខ្ញុំនិយាយឲ្យបើកចំហអញ្ចឹងតែម្ដងទៅ ហ៊ុន ម៉ាណែត បានរាយការណ៍មកឲ្យខ្ញុំ។ គេបានដឹងហើយថា ហ៊ុន ម៉ាណែត ជាបេក្ខភាពនាយករដ្ឋមន្ត្រីបន្តពីខ្ញុំ។ ថាច់ សេដ្ឋា បានទៅសុំជួបបានលើកឡើង ហើយម៉ាណែយបានទូន្មាន ថាច់ សេដ្ឋា សូមឱ្យសមាជិកសមាជិការបស់អ្នកឯងកុំប្រព្រឹត្តខុសច្បាប់។ នេះជាការទូន្មានរបស់ម៉ាណែតត្រឡប់ទៅវិញ។ បើអ្នកឯងមិនប្រព្រឹត្តខុសច្បាប់តើអ្នកណាគេទៅធ្វើអីអ្នកឯង?»៕
